大佬都冇面俾

本文曾刊載於 2022-07-07《明報》加西版 無心的約會 專欄

新加坡總理夫人轉發漫畫 諷刺特朗普雙重標準

社團領袖，最緊要好似三疊潭噉：疊水、疊馬、疊架撐。美國貴為世界一哥，坐擁 11 個核航母戰鬥群、無限量印鈔機，又有北約、歐盟、五眼一大班𡃁前呼後擁，帶埋刺針、標槍、彈簧刀、戰斧四出挑機，誰與爭鋒？邊個唔順氣，都被搞到雞毛鴨血，顏色加身。本應所向披靡，一統江湖，偏偏近來多個環頭都生暗湧，陽奉陰違之外，更加口不擇言。怪不得有言：大佬唔易做！

由阿拉斯加的中美講數會談開始，楊潔篪就說美國未有資格和實力向中國訓話，中國人不吃這一套！大佬想第二人口大國印度譴責和制裁俄羅斯，印度唔聽佢支笛；叫佢唔好幫俄國佬買石油，點知印度恃住有印度神油壯膽，竟趁俄油大減價大量入貨。當然唔係送禮自用咁簡單，係將用唔曬嘅俄油好似中國噉將協議要向美國買嘅液化天然氣轉手加價，賣俾歐盟諸國賺番一筆。歐盟各國無犯規直接買俄油、天然氣，但又有石油、天然氣用，既解決歐盟能源危機又無得罪大佬，而兜過圈將黑色石油漂白，好似洗黑錢噉，真係一舉數得㗎。當紅印度主持人阿納布 Arnab 怒懟美國教授 Charles Kupchan：「請搞清楚，你們才是在烏克蘭建立生物實驗室的人；是拜登兒子在烏做各種生意；是你們美國在烏搞事；是你們搧動和慫恿烏克蘭……那是你們挑起的戰爭！」

大佬見年尾選坐館，帶埋 1.5 億美金，約東協班叔父開會。點知今時唔同往日，越南幫話事人總理范明政開完會與手下交談，明知俾人偷偷錄緊影，居然講「他X的，有甚麼好怕的？……俄、烏開片就係美國搞出來的……」噉唔俾面。相信錄唔倒嗰 D 仲勁、仲難聽，少不免會話「俾烏記都 400 億，俾我哋零頭都冇，係咪當哋地係乞兒先？不如玩番一帶一路。」新紮師兄小馬可斯說任內將與中國有更高層次合作，柬浦寨洪森講明不會在中美之間選邊站。

轉去美洲山頭開會，小字頭尼瓜拉瓜總統奧蒂嘉對美國不邀請他和一起退出美洲國家組織的委內瑞拉和巴西，出言不遜大罵：「算了吧，美國佬！我們對出席美洲峰會，完全沒有興趣（講足幾次），參加峰會對我們完全沒幫助，峰會只會令參加者更加沉淪腐敗……我們就是你扔垃圾的院子。」部份叔父當然分別和應，連同被美國制裁了幾十年的古巴，將漸漸靠攏中國和俄羅斯。時而世易，今非昔比。大佬要習慣吓與時並進。有朝一日，可能要借用電影《英雄本色》嘅對白：「我冇做大佬好耐喇！」