震震有辭

本文曾刊載於 2021-07-19《明報》加西版 無心的約會 專欄

Wix Photo

正在聚精匯神聽演講，卻被其他參加者的電話鈴聲打斷，相信大家都試過這樣的不愉快經歷。而作為講座的演講者或主持人，怎樣以言辭勸諭參加者關掉手機（或鈴聲），調較至震動提示呢？僅舉三例：

官式：「各位貴賓，為免影響講座 / 會議的進行，請將閣下的手提電話（或來電提示的鈴聲）關掉，（或）調較至震動提示，多謝合作。」可惜，總有些自私的參加者，像在等待幾百億生意回覆或者正在遠方愛妻的分娩結果，一於闊佬懶理，每到演講者落力演講的精彩時刻，便鈴聲大作，甚為掃興。

恐嚇式：「各位，在講座進行期間，我哋會同時進行小遊戲，如果邊個參加者嘅手機鈴聲響起，就表示想參加遊戲，請立即上台作自我介紹，跟住為我哋表演歌舞三分鐘，等大家輕鬆一下。如果唔想參加遊戲嘅話，請將你嘅手提電話較到震動提示，多謝各位。」但係如果踫上參加者係演藝界中人、勁有表演慾或者係面皮厚過無恥政客的人，呢招未必有效。

搞笑式：「我係世界上唯一唔怕手提電話鈴聲騷擾我演講嘅人，大家隨便任由你個手機鈴聲開住啦。不過，我要提醒各位，咁樣做係會有生命危險㗎！我有個朋友就試過唔關鈴聲，搞到被人打到重傷，因為佢嘅手機鈴聲響個陣，佢啱啱暱咗入佢隔籬屋靚女鄰居既主人房嘅衣櫃裡面！」通常笑聲過後（想像情境：靚女嘅空手道教練老公突然間番咗嚟，撞破姦情），大多數參加者都會合作，乖乖拿出手機，較去震動提示。

大家作為講座、會議、電影、演唱會、歌劇等的參與者或觀眾，為人為己，在該時段，都應該主動將手提電話關掉或調較至震動提示，以免影響他人。如果必需通話，請移玉離場對答，這是基本禮貌和常識。